Поэзия (Шигърият)

Стихи на татарском языке

Печать

Кайчакларда

Кайчакларда кояш шундый якты,

Нурларыннан күзләр чагыла.

Кайчакларда кояш шундый була,

Кара пәрдә гүя ябыла.

Мин дә шулай нәкъ табигать кебек

Кайчак ачылам, кайчак йомылам.

Кайчакларда илһамланып китеп,

Йөрәгемдә хисләр кабына.

Дөнья беткән кебек тоела да,

Күңел кителә, яшьләр агыла.

Уйга калам… Яшәү барыбер ямьле

Күңелгә кабат канат куела.

Рая Рамазанова,

Иштирәк авылы.

 

Сиреньнәр

Ачкан тәрәзәмнән талгын гына

Сиреньнәрнең исе агыла.

Гашыйклардай үбеп битләреннән

Кабат борылырга ашыга.

Сөюемнең чиксез икәненә

Сиреньнәр дә әллә аңлады

Хуш исенә манып күтәрде дә

Үз ягына таба атлады.

Айный алмас ләззәт кичердем мин,

Сирень агачының төбендә.

Юлларыма каршы чыкчы иркәм,

Сирень чәчәгенә төрен дә.

Яшьлегемә кайтам иснәгәндә

Сирень чәчәгенең исләрен

Онытылып торам бер минутка

Сине уйлаганда кичләрен.

Сирень чәчәгенә әйләнәм дә

Гашыйкларга сөю өләшәм

Ис китәрлек матур чәчәкләрдән

Ни өчен соң һәрчак көнләшәм?!

Гүзәл Гәрәева,

Теләкәй авылы.

 

Бердәм яшик

Бер бармагың белән күтәр йөкне,

Бер бармакның бармы соң көче?!

Биш бармагың белән күтәргәндә

Бармакларың булырлар көчле.

Күп милләтле бердәм илкәебез,

Буйсынабыз төрле диннәргә,

Бердәм яшәү белән үрнәк булыйк

Җир шарында башка илләргә.

Бердәм булсак кына, бергәләшеп

Дошманнарга каршы торырбыз.

Хыялларда булган оҗмахны да

Изге җир өстендә корырбыз.

Җәннәт Шакирова,

Дөмәй авылы.

 

Рәхмәт илем

Һәр кыз бала бу дөньяга

Ана булыр өчен яралган.

Бу бәхеттән мәхрүм итә күрмә,

Диеп сорыйм газиз Алладан.

Кешеләргә бүләк ителәдер

Мәхәббәтнең татлы мизгеле

Шул мизгелдә ярала җаннар

Яратуның изге җимеше.

Туар җанны кире какмагыз,

Киләчәгем, диеп яклагыз.

Нәсел агачының бөресе диеп,

Давыл салкыннардан саклагыз.

Ике якның сәләтләрен алып,

Дәвам итеп безнең гомерне.

Үсеп һәрбер бала кадерләүдә

Шушы олы бәхет түгелме?

Баланы газиз димәгез,

Газиз Алла бер генә.

Миннән артык күрә диеп,

Ходай алыр үзенә.

Бәхетле, озын гомерле

Булып тусын балалар

Балаларның куанычын

Күрсен ата-аналар.

Туган илкәем, мең рәхмәт

Бәһалыйсың Ананы.

Хәстәрлекләр белән чорнап

Үстерәсең баланы.

Җәннәт Шакирова,

Дөмәй авылы.

 

Илеш кызлары

Базы суын эчкән кызлар

Бигрәк нәфис, сөйкемле.

Күкрәгендә җаның булса,

Күз салмавың икеле!

Туган якны бизәп яши

Уңган Илеш кызлары.

Серле карап елмаялар –

Нәкъ Җиһан йолдызлары.

Кулларыннан гөл түгелә,

Дәртле җырга, биюгә.

Җан азыгы - туган, дуска,

Тап төшерми сөюгә.

Зифа сынлы, сылу кызлар

Үсә Илеш ягында.

Гүзәлләрне күрим дисәң,

Кил син монда тагын да!

Зәлифә Кашапова,

Иштирәк авылы.

 

Аяз бүген безнең күгебез

Сугыш… Нинди явыз сүз бит,

Үзәкләрне өзә авазы.

Туктаганга инде ничә еллар

Һаман сызлый йөрәк ярасы.

Аерды күпләрне газиз ирләреннән,

Сөйгән ярларыннан аерды.

Өметләнеп яшәп яткан чакта

Пар канаткайларын каерды.

Нәни сабыйларны әтиләрдән,

Аналардан улын аерды.

Миллионнарны туган илләреннән

Газиз туфрагыннан аерды.

Көтмәгәндә ябырылды фашист,

Ут-ялкыны җирне сарыды.

Кара сөреп каплап туган илне,

Гүя кояш мәңге баеды.

Тик барыбер баш имәде халкым,

Туган ил хакына яшәде.

Җанын-тәнен кызганмыйча тырышып,

Яшеннәрдәй яшьнәп эшләде.

Ачлыкка да түзде, ялангычлыкка да,

Ташкынлыкка да түзде, чыдады.

Фашист-козгынны җиңеп,

Илебездән куып чыгарды.

Туган илкәебез бигрәк ямьле,

Аяз бүген аның күкләре.

Безнең шушы бәхетле тормышка

Көнләшәдер әле күпләре.

Тынычлыкның кадерләрен белеп,

Шөкер итеп кенә яшәрлек.

Тик сугышлар гына була күрмәсен,

“Сугыш” сүзе үзе үк каһәрле.

Рая Рамазанова,

Иштирәк авылы.

 

Бер күрешү – үзе бер гомер

Якты дөньялардан туймасак та

Кабат туып булмый анадан.

Кеше бер кат туа, бер кат яши

Тик бер кабат китә дөньядан.

Киләчәкне алдан белеп булмый,

Кем гомере кайчан өзелер.

Исәнлектә күбрәк күрешик,

Бер күрешү – үзе бер гомер.

Оҗмах булулары дөрестер ул,

Бер киткәннәр кире кайтмыйлар.

Хәлләр ничек, диеп барып сорап булмый

Үзләре дә килеп әйтмиләр.

Күрәчәкне алдан белеп булмый,

Кем гомере кайчан өзелер.

Исәнлектә күбрәк күрешик,

Бер күрешү – үзе бер гомер.

Күпме яшәсәк тә язмышларны

Кабат язып булмый яңадан.

Язмышлар бит безнең маңгайларга

Ана сөте белән язылган.

Киләчәкне алдан белеп булмый,

Кем гомере кайчан өзелер.

Исәнлектә күбрәк күрешик,

Бер күрешү – үзе бер гомер.

Радик Мослыхов,

Югары Яркәй авылы.

 

Бердәнберем

Таңнар атып тәрәзәмә,

Кояш нуры төшкәндә.

Уянырга вакыт диеп,

Иртәнге җил искәндә.

Син бит минем бердәнберем,

Сагышым да, назым да.

Сандугач булып калырсың,

Тормышымның язында.

Яз аенда алмагачлар,

Ап-ак чәчкә атканда.

Алсу нурын җиргә сибеп,

Кичен кояш батканда.

Син бит минем бердәнберем,

Сагышым да, назым да.

Сандугач булып калырсың,

Тормышымның язында.

Тәрәзәмә көзге яңгыр

Тамчылары тамганда.

Мин бит сине өзелеп сагынам,

Кышын карлар яуганда.

Син бит минем бердәнберем,

Сагышым да, назым да.

Сандугач булып калырсың,

Тормышымның язында.

Радик Мослыхов,

Югары Яркәй авылы.